Nta cyiza kiba mu gukoresha telefoni utwaye ikinyabiziga!

 Inshamake   Bikunze kugaragara ko impanuka nyinshi ziterwa n’abantu bagenda bavugira kuri telefoni mu gihe batwaye ibinyabiziga, aho umutima uba uri ku biganiro arimo kuvugira kuri telefoni aho gutekereza ku kinyabiziga atwaye, ibi bikaba bibi kuko bishobora guteza impanuka, bigatuma ubuzima bw’abatari bake buhagendera, ari nabyo bamwe mu bakoresha umuhanda bavuga ko bikwiye gucika.

Nta cyiza kiba mu gukoresha telefoni utwaye ikinyabiziga!

 Inshamake   Bikunze kugaragara ko impanuka nyinshi ziterwa n’abantu bagenda bavugira kuri telefoni mu gihe batwaye ibinyabiziga, aho umutima uba uri ku biganiro arimo kuvugira kuri telefoni aho gutekereza ku kinyabiziga atwaye, ibi bikaba bibi kuko bishobora guteza impanuka, bigatuma ubuzima bw’abatari bake buhagendera, ari nabyo bamwe mu bakoresha umuhanda bavuga ko bikwiye gucika.

Umusare - Amakuru mu buryo utamenyereye.

Ibi ni ibitangazwa n’Ishami rya Polisi y’u Rwanda rishinzwe umutekano wo mu muhanda; aho risaba umuntu wese utwaye ikinyabiziga kwirinda uwo muco mubi kuko bishyira ubuzima bw’abagenzi mu kaga, ni mu gihe kandi abafite ibinyabiziga nabo ari ko babibona kuko mu gihe utwaye ikinyabiziga uvugira kuri terefone cyangwa wandikirana ubutumwa bugufi n’abandi; icyo gihe ibitekerezo n’ubwenge biba byibereye ahandi bityo umutima uterekeje ku kinyabiziga utwaye.


Uzasanga rero habayeho impanuka aho ibinyabiziga ababitwaye bagonze ibikorwa remezo  ku mihanda nk’imikinda , ibiti bisanzwe,ibyuma by’amashanyarazi, inzu z’ubucuruzi n’izindi ndetse n’abantu baba bigendera, bigateza igihombo kuri buri wese kubera ubuzima bw’inzirakarengane buhatakarira ndetse na ba nyir’ibinyabiziga ubwabo kuko amakosa nk’ayo Polisi y’u Rwanda itayihanganira.

Polisi y’u Rwanda ntiyihanganira abakora amakosa yo gutwara ibinyabiziga banakoresha telefoni.


Muzungu Alphonse ni umuturage ufite ikinyabiziga akaba atwara imizigo mu Gakiriro ka Gisozi mu karere ka Gasabo, akaba avuga ko ari ikosa rikomeye kuri bamwe mu batwara ibinyabiziga bagenda bavugira kuri telefoni.  
Muzungu yagize ati:”Bamwe  muri bagenzi bacu batwara ibinyabiziga bakora amakosa nkana nko kuvugira kuri telefoni, kwandikirana ubutumwa bugufi kuri terefone n’inshuti zabo cyangwa imiryango yabo  kandi amabwiriza agenga gutwara ikinyabiziga atabyemera . Ubuzima bw’abantu bugomba guhabwa agaciro kandi bukabungwabungwa”.


Hakizimana Emmanuel we ni umushoferi umaze igihe cy’imyaka 20 akora  umwuga wo gutwara abantu  muri tagisi  yagize ati:” Mbona impanuka nyinshi ziterwa n’uburangare bw’abashoferi rimwe na rimwe nko kuvugira kuri terefone kandi batwaye. Uyu muco mubi ntabwo wakwihanganirwa, turasaba ababikora kubireka kuko atari ubunyamwuga kandi binasebya aka kazi.

Bamwe mu bakoresha umuhanda bemeza ko bidakwiye kuvugira kuri telefoni utwaye, kuko umutima uwushyira ku byo uri kuyivugiraho aho kuwushyira ku kinyabiziga utwaye.


Umuhire Josiane we ni umubyeyi utuye mu karere ka Kayonza; akunda gukorera ingendo nyinshi mu Mujyi wa Kigali aza kurangura ibicuruzwa bitandukanye. 
Yagize ati:”Hari igihe nigeze kugera i Nyagasambu ndi mu modoka ya sosiyete itwara abagenzi umushoferi agonga umunyegare kubera uburangare  bitewe n’uko  yavugiraga kuri terefone ariko ku bw’amahirwe ntacyo yabaye. Ibi rero nk’abagenzi turabyamaganye kandi ndashishikariza abagenzi ko mu gihe babonye ubatwaye avugira kuri terefone bajya bamusaba kubireka yakwanga bakamuhagarika bakavamo bagatega indi modoka ndetse bakabimenyesha polisi yacu.”

Umuvugizi w’Ishami rya Polisi y’u Rwanda rishinzwe umutekano wo mu muhanda Senior Superintendent (SSP) JMV Ndushabandi yasabye abatwara ibinyabiziga kureka kuvugira kuri terefone mu gihe batwaye ibinyabiziga ndetse no kwandikirana n’abandi ubutumwa bugufi kuri terefone kuko ari bimwe mu biteza impanuka.
SSP Ndushabandi yagize ati:”Turasaba abagenzi kujya bahararanira uburenganzira bwabo bwo kugera iyo bajya amahoro, banga gutwarwa n’umushoferi washyira ubuzima bwabo mu kaga”.

Hari n'abashoferi batwara imodoka rusange bafite umuco mubi wo gukoresha telefoni batwaye abantu, Polisi ikaba isaba abagenzi kujya bahararanira uburenganzira bwabo bwo kugera iyo bajya amahoro.


SSP Ndushabandi yakomeje asaba abanyarwanda kujya bahita bamenyesha Polisi y’u Rwanda bahamagaye  kuri nimero zayo  za terefoni  0788311110, 0788311502, 113 dore ko ziba zinamanitse imbere ku rupapuro rwegereye aho utwaye ikinyabiziga aba yicaye.

GIRICYO UBIVUGAHO


Iyi nkuru ntiravugwaho!