Nyuma yo guhura n’amoshya, abamotari b’i Nyagatare bagiye gusinya imihigo n'Akarere

 Inshamake   Abamotari ba Nyagatare bagiye gusinya imihigo n’Akarere mu rwego rwo gukumira ibyaha bakora byiganjemo gutunda no gukwirakwiza ibiyobyabwenge.

Nyuma yo guhura n’amoshya, abamotari b’i Nyagatare bagiye gusinya imihigo n'Akarere

 Inshamake   Abamotari ba Nyagatare bagiye gusinya imihigo n’Akarere mu rwego rwo gukumira ibyaha bakora byiganjemo gutunda no gukwirakwiza ibiyobyabwenge.

Umusare - Amakuru mu buryo utamenyereye.

Bamwe mu bamotari bo mu   karere ka Nyagatare, Intara   y'Iburasirazuba    bavuga   ko   bakunze   guhura n’amoshya yo gushaka indonke nyinshi, ibi bikaba bibakururira kwishora  mu byaha birimo ibyambukiranya imipaka nko gutunda no gukwirakwiza ibiyobyabwenge byiganjemo Kanyanga ndetse no gukwirakwiza magendu, dore ko aribyo biri ku isonga  mu gukorwa n'abakora umwuga wo gutwara abagenzi kuri moto muri iyi ntara. 


Bakaba bariyemeje ko bagiye gushishakariza bagenzi babo kwirinda kwishora muri izo ngeso mbi, kugira ngo babashe kubaho neza batunge imiryango yabo nayo ibashe kubaho neza, ndetse biyemeza kujya batangira amakuru ku gihe ku bantu abari bo bose bashaka kubashora mu byaha, haba abo batwara ndetse na bagenzi babo bafite imyumvire mibi.

Bamwe mu bamotari b'i Nyagatare bavuga ko bakunze guhura n’amoshya yo gushaka indonke nyinshi, bigatuma bishora mu byaha.


Ni mu gihe Umuyobozi w'Intara y'Iburasirazuba, CG Gasana Emmanuel, ubwo yaganiraga n’abamotari bakorera i Nyagatare ku Cyumweru tariki 16 Mutarama 2022, yavuze ko mu rwego rwo gukumira ibi byaha  bafashe icyemezo ko bagiye gusinyana imihigo igamije guca burundu ibyo byaha.


Guverineri Gasana yagize ati

Iyi ni inama y’agaciro kenshi, bakora akazi keza ko gutwara abantu n’ibintu, ariko by’umwihariko turabasaba ubufatanye, gukora kinyamwuga birinda gukora ibyaha byambukiranya umupaka bitemewe n’amategeko, ndetse tunabasaba gufatanya mu mihigo tugiye gusinyana igamije koperative itarangwamo icyaha.

CG Gasana Emmanuel uyobora Intara y'Iburasirazuba, avuga ko imihigo bagiye gusinyana n'abamotari igamije koperative itarangwamo icyaha.


Yakomeje avuga ko ibyaha byambukiranya imipaka bigihari, ari nayo mpamvu bari muri izo ngamba zo gusinyana umuhigo nk’igihango bazaba bafitanye n’Akarere, dore ko inama nk’izi banaberekamo abakoze ibyaha nk’ibyo, bakanasobanurirwa ibihano birimo nko gufungwa imyaka 25 iyo uhamijwe ibyo byaha, ukaba wabura ikinyabiziga cyawe n’ibindi; bakwiye rero kubyihana bakabyirinda, dore ko nabo babyiyemerera, ni mu gihe iyi mihigo biteganijwe ko izasinywa mu mpera z'uku kwezi kwa Mutarama. 


Kugeza ubu Akarere  ka  Nyagatare kabarizwamo abamotari bagera  ku 1315 bibumbiye mu makoperative 23, kakaba ari ko kabimburiye utundi turere mu gusinya iyi mihigo, ni mu gihe amakuru dukesha Polisi y'igihugu ihakorera, abamotari bagera kuri 78  bacumbikiwe kuri sitasiyo(satations) zitandukanye zayo, ahanini bazira ibyaha byo kwishora mu gutunda no gukwirakwiza ibiyobyabwenge, kwambukiranya imipaka mu buryo bunyuranyije n'amategeko, ndetse no kwikorera magendu aho bisaba ubukangurambaga bwimbitse ngo ibi byaha bicike.

Abamotari bitabiriye inama beretswe bagenzi babo bafatiwe mu byaha, dore ko kuri ubu abagera kuri 78  bacumbikiwe kuri sitasiyozitandukanye za Polisi ikorera i Nyagatare.
Abamotari bakorera mu karere ka Nyagatare ubwo bari mu nama yari iyobowe na Guverineri w'Intara y'Iburasirazuba.

 

GIRICYO UBIVUGAHO


Iyi nkuru ntiravugwaho!