Trump yababariye bamwana we n'abari abajyanama be bari bafunze

 Inshamake   Perezida wa Amerika Donald Trump yababariye uwahoze ashinzwe ibikorwa bye byo kwiyamamaza Paul Manafort, uwari umujyanama we Roger Stone ndetse na bamwana we (se w'umugabo w'umukobwa we).

Trump yababariye bamwana we n'abari abajyanama be bari bafunze

 Inshamake   Perezida wa Amerika Donald Trump yababariye uwahoze ashinzwe ibikorwa bye byo kwiyamamaza Paul Manafort, uwari umujyanama we Roger Stone ndetse na bamwana we (se w'umugabo w'umukobwa we).

Umusare - Amakuru mu buryo utamenyereye.

Aba bagabo batatu bari mu bantu 29 bahawe imbabazi za nyuma za perezida mbere y'uko mu kwezi gutaha ava mu biro agahigamira mugenzi we watowe, aho 26 muri bo bahawe imbabazi zisesuye mu ijoro ryo kuri uyu wa Gatatu tariki 23 Ukuboza 2020, abandi batatu bo perezida yoroheje ku bihano byabo.

 

Perezida wa Amerika kenshi iyo agiye kuva mu biro atanga imbabazi kuri bamwe mu mfungwa, aho kuva kuri George HW Bush, ubu Bwana Trump niwe ukoresheje ubu bubasha akababarira imfungwa nkeya.

 


Paul Manafort yafunzwe mu 2018 nyuma y'iperereza ryacyekaga uruhare rw'Uburusiya mu matora ya perezida wa Amerika ya 2016; akaba Paul yari afungiye mu rugo rwe kuva mu kwezi kwa gatanu, kubera gutinya ko yakwandurira coronavirus muri gereza, yahise yandika kuri Twitter ko "...nta magambo yasobanura uburyo ashimiye".

 

Mu gihe gishize, Trump yari yaroroheje ku gihano cy'igifungo cya Roger Stone wahamijwe icyaha cyo kubeshya inteko ya Amerika ko atagerageje kuvugana na Wikileaks, urubuga rwasohoye amakuru abangamiye Hillary Clinton, mukeba wa Trump mu matora ya 2016.

 

Kuwa gatatu nijoro, uyu mugabo w'inshuti ya Trump y'igihe kirekire, yishimiye ko koroshya igihano ubu kwahindutse imbabazi zisesuye, ariko ikinyamakuru Politico kivuga ko yavuze ko n'ubundi yari yararenganyijwe "mu rubanza rufite imvo za politiki".

 

Stone kandi yari amaze igihe asaba Trump ko mbere yo kuva muri White House yanababarira Julian Assange uri mu bashinze Wikileaks na Edward Snowden wahoze akorera National Security Agency agasuka amabanga menshi hanze.

 

Ni mu gihe bamwana we, Charles Kushner, umuherwe washoye imari mu byo kubaka inzu zo guturamo akaba na se wa Jared Kushner umugabo wa Ivanka Trump nawe ari mu baraye bababariwe, nyuma y’aho mu mwaka wa 2004 yakatiwe gufungwa imyaka ibiri kubera ibyaha birimo kunyereza imisoro no gukorera amabi abatangabuhamya, igihano cye kikagenda gisubikwa.

 

Ibi kandi bije nyuma y’aho ku wa Kabiri Trump nabwo yari yababariye abandi bantu 15, anorohereza abandi batanu ibihano byabo.

GIRICYO UBIVUGAHO


Iyi nkuru ntiravugwaho!